Embætti landlæknis hefur gefið út nýjan bækling á íslensku, ensku og pólsku um skimun fyrir leghálskrabbameini, í samstarfi við Samhæfingarstöð krabbameinsskimana hjá Heilsugæslu höfuðborgarsvæðisins.
Í bæklingnum má finna á einum stað upplýsingar um boðun í leghálsskimun, hvernig skimanir fara fram og í hvaða tilgangi skimað er fyrir leghálskrabbameini, svo eitthvað sé nefnt.
Konur á aldrinum 23 til 64 ára fá reglulega boð í leghálsskimun og er skimunin framkvæmd á heilsugæslustöðvum um allt land. Konur á aldrinum 23 til 29 ára fá boð um að mæta í skimun á þriggja ára fresti og konur á aldrinum 30 til 64 ára á fimm ára fresti.
Eykur lífslíkur
Skimunin er ætluð einkennalausum, heilbrigðum einstaklingum og er markmiðið að greina leghálskrabbamein á frumstigi. Þannig er hægt að minnka þörf á inngripi, auka líkur á að hægt sé að nota vægari meðferð og auka lífslíkur þeirra sem greinast.
Hægt er að lesa meira um leghálsskimanir í bæklinginum, sem er aðgengilegur á íslensku, ensku og pólsku:
- Íslenska: Skimun fyrir leghálskrabbameini
- Enska: Cervival cancer screening
- Pólska: Badania prezesiewowe w kierunku raka szyjki macicy