Guðlaug Unnur Þorsteinsdóttir, geðlæknir hefur verið ráðin sem framkvæmdastjóri geðheilbrigðismála hjá Heilsugæslu höfuðborgarsvæðisins (HH). Þetta er ný staða hjá HH.
Guðlaug hefur víðtæka reynslu í stjórnun og klínískri vinnu. Hún tók sérnám í Svíþjóð í almennum geðlæknum og flutti heim til Íslands árið 1996. Guðlaug hefur að mestu starfað á geðdeild Landspítala frá því hún flutti heim frá Svíþjóð en auk þess hefur hún komið að afleysingum á geðdeild á Akureyri og í Svíþjóð. Hún er klínískur lektor við Háskóla Íslands 2017, og hefur komið mikið að kennslu og handleiðslu nema, bæði á Landspítala og Endurmenntun HÍ.
Guðlaug var í forsvari fyrir átröskunarteymi geðdeildar frá árinu 2006 en hætti þar árið 2019. Á þeim tíma vann hún einnig í gæðamálum og var formaður gæðaráðs geðdeildar árin 2010 - 2014. Frá árinu 2020 hefur hún starfað sem yfirlæknir á fíknigeðdeild Landspítala. Þá hefur hún samhliða starfi sínu á LSH rekið læknastofu frá árinu 1997 með hléum og hefur frá árinu 2017 rekið læknastofu á Höfða.
Við bjóðum Guðlaugu Unni velkomna til starfa hjá Heilsugæslu höfuðborgarsvæðisins.