"Valdefling í verki, er okkar vörumerki"
Hugarafl heldur upp á 6 ára afmæli sitt, föstudaginn 5. júní næstkomandi.
Afmælið hefst með gjörningi kl. 13:00, fyrir utan Geðdeild Landspítalans við Hringbraut.
Heilsað verður upp á fulltrúa þaðan og svo verður lagt af stað með sjúkrarúm. Gengið verður fylktu liði sem leið liggur eftir Eiríksgötu, yfir Skólavörðuholtið, niður Skólavörðustíg og endað á Kaffi Rót, Hafnarstræti 17. Þar verður kaffi og með því og allir eru velkomnir.
Í rúminu verður að sjálfsögðu manneskja í náttfötum. Þeir sem fylgja rúminu verða líka klæddir á viðeigandi hátt, svo sem í náttfötum. Áherslan verður á litadýrð, fjölbreytileika og gleði.
Svipaður gjörningur hefur verið gerður erlendis til að breyta viðhorfum almennings til geðheilbrigðismála. Gjörningurinn verður framkvæmdur í samvinnu við lögreglu og vonandi að sem flestir sem láta sig málaflokkkinn varða, sjái sér fært að vera með og ganga til áhrifa.
Markmiðið er í fyrsta lagi að halda upp á 6 ára afmæli Hugarafls, en einnig að vekja athygli á fordómum í garð geðsjúkra, berjast fyrir auknum réttindum og minna á mikilvægi þess að bjóða upp á fleiri valkosti í meðferð.
Athygli er vakin á þeirri staðreynd að margt er hægt að gera í meðferð geðsjúkra og bati er mögulegur. Minnt er á að til eru aðrar leiðir en hefðbundið kerfi býður upp á, einstaklingar eru mismunandi og þurfa að hafa hlaðborð af valmöguleikum.
Hugarafl hvetur alla til að taka þátt í þessum gjörningi.
Hugarafl og Geðheilsa - Eftirfylgd/iðjuþjálfun eru til húsa að Álfabakka 16.