Heilsugæslan heldur utan um einstaklinga í sóttkví

Mynd af frétt Heilsugæslan heldur utan um einstaklinga í sóttkví
02.03.2020

Einstaklingar eru beðnir um að vera í sóttkví í 14 daga frá dvöl á áhættusvæði eða samkvæmt ráðleggingum heilbrigðisstarfsfólks eftir náin samskipti við smitaða einstaklinga.  

Heilsugæslustöðvar halda utan um skjólstæðinga sína sem eru í sóttkví. Verið er að koma upplýsingum á heilsugæslustöðvar um þessa einstaklinga.
Ef þú ert í sóttkví og heilsugæslustöðin þín er ekki búin að hafa sambandi við þig er mælt með því að þú hafir samband sem fyrst.

Allar upplýsingar um sóttkví eru á landlaeknir.is

Ef þú ert með einkenni og hefur verið á hættusvæði eða umgengist smitaðan einstakling er mælt með sýnatöku. Ekki eru tekin sýni úr einkennalausum einstaklingum

Heilsugæslustöðvar sjá um sýnatökur sem fara venjulega fram í bíl viðkomandi við heilsugæslustöðina. Sýnatökur eru einu sinni á dag.  Ef ekki er hægt að taka sýni í bíl viðkomandi eru gerðar aðrar ráðstafanir.

Ekki koma á heilsugæslustöðina þína án þess að hafa samband fyrst ef þú ert með einkenni og telur að möguleiki sé á Covid-19 smiti.

Alltaf eru nýjustu upplýsingar um Covid-19 á landlaeknir.is

Ef upplýsingar á landlaeknir.is svara ekki spurningum þínum getur þú haft samband við heilsugæslustöðina þína á dagvinnutíma, netspjall á heilsuvera.is eða vaktsímann 1700.

Áfram minnum við alla á að:

  • Gæta vel að almennu hreinlæti, sérstaklega handþvotti með sápu og vatni.
  • Handspritt má nota ef ekki er hægt að þvo hendur. Þó skyldi alltaf þvo hendur með sápu og vatni ef þær eru sýnilega óhreinar.
  • Forðast náið samneyti við einstaklinga sem eru með almenn kvefeinkenni/hósta.
  • Ekki snerta munn, nef eða augu með óþvegnum höndum.
  • Nota pappír fyrir vit við hnerra og hósta, eða hósta í olnbogabót. Henda skal pappír eftir notkun og þvo hendur reglulega

Þetta er verkefni okkar allra.