Meðganga er oft tími gleði og tilhlökkunar en getur líka verið krefjandi bæði andlega og líkamlega. Það er eðlilegt að finna fyrir alls konar líðan, hugsunum og tilfinningum.
Á þessu hópnámskeiði færðu leiðsögn að leiðum til að stuðla að vellíðan. Rætt verður um andlega heilsu og farið inn á þætti eins og kvíða og áhyggjur, óvissu, depurð, streitu og sjálfsmynd. Við skoðum hvað við getum gert til að okkur líði betur. Við horfum til barnsins í móðurkviði út frá getu þess á ólíkum tímum meðgöngunnar og hvernig lesa má í merki þess bæði á meðgöngu og eftir fæðingu. Farið verður inn á líðan gagnvart fæðingunni og tímann eftir fæðinguna með nýfædda barninu. Einnig verða kynnt frekari úrræði innan sem utan Heilsubrúar sem konur geta nýtt sér að námskeiði loknu.
Verðandi foreldrar hafa gjarnan áhyggjur af nýja barninu. Verður barnið heilbrigt? Getum við sinnt barninu vel og hugsað vel um það? Það getur reynst þér erfitt sérstaklega ef þú hefur átt erfitt í gegnum lífið á einhvern hátt. Eða ef þú ert undir álagi vegna streitu eða átt við heilsuvanda að stríða.
Eitt af því besta sem þú getur gert á meðgöngunni er að hugsa el um sjálfa þig meðan þú undirbýrð komu barnsins.