Nú eru allar fimmtán heilsugæslustöðvar Heilsugæslu höfuðborgarsvæðisins (HH) byrjaðar að nota Veru. Síðast bættust í hópinn Heilsugæslan Efstaleiti og Heilsugæslan Hlíðum.
Þessi áfangi er mikið ánægjuefni og liður í að bæta þjónustu heilsugæslunnar. Þeir sem eru skráðir á heilsugæslustöðvar HH eru hvattir til að nýta sér þennan möguleika til samskipta við sína stöð.
Heilsuvera.is er öruggt vefsvæði þar sem notandi getur átt í samskiptum við heilbrigðisþjónustuna og nálgast gögn sem skráð eru um hann í heilbrigðiskerfið á Íslandi. Til að auka öryggi við innskráningu er krafist rafrænna skilríkja.
Í Veru er hægt að panta tíma og endurnýja ákveðin lyf og auk þess er aðgangur að lyfseðlalista, lyfjaúttektum, bólusetningaupplýsingum og upplýsingum um skráðan heimilislækni eða heilsugæslu.
Foreldrar/forráðamenn hafa aðgang sjúkraskrárgögnum barna sinna að 15 ára aldri. Fjórar heilsugæslustöðvar hjá HH bjóða að auki upp á einfaldar fyrirspurnir.
Hér getur þú opnað Heilsuveru: www.heilsuvera.is