Ljósmæðranemar

Ljósmóðurfræði er 120 eininga, fræðilegt starfstengt nám á meistarastigi við hjúkrunarfræðideild Háskóla Íslands. Nánari upplýsingar um námið er að finna á vef Háskóla Íslands.

Á fyrra námsári er hverjum nemanda úthlutað námsplássi á heilsugæslustöð og neminn fær sína klínísku þjálfun í meðgönguvernd á þeirri stöð út námstímann. Nemandi er á sama tíma í starfsþjálfun á öðrum heilbrigðisstofnunum þar sem fæðingarhjálp á sér stað og auk þess vinna nemendur í heimahúsum undir leiðsögn ljósmæðra.

Allar heilsugæslustöðvar hjá HH taka við nemum í ljósmóðurfræði. Nemendur eru á stöðvunum ákveðna daga í hverri viku þannig að þeir kynnist konunum/verðandi foreldrum og fylgi þeim eftir eins og kostur er.

Umsjón með klínísku námi ljósmæðra hjá HH hafa Karitas Ívarsdóttir og Ragnheiður Bachmann ljósmæður á Þróunarstofu.

Í klínískri þjálfun á heilsugæslustöðvum er lögð áhersla á að nemendur kynnist hugmyndafræði heilsugæslunnar og því hvernig þjónusta ljósmæðra fellur að heilsuvernd.

Meðal annars er gert ráð fyrir að nemandi öðlist færni í að:

meta og greina einstaklingsbundnar þarfir og óskir kvenna og fjölskyldna þeirra.
meta andlega líðan kvenna á meðgöngu og þekkja meðferðarúrræði heilsugæslunnar.
meta og greina meðgöngulengd, vöxt fósturs, fósturhjartslátt og legu.
greina frávik frá eðlilegri meðgöngu og þekkja leiðir til að bregðast við þeim.
veita upplýsingar um tilgang og skipulag mæðraverndar þ.m.t. þau skimpróf og rannsóknir sem standa konum/verðandi foreldrum til boða á meðgöngu.
veita fræðslu um meðgöngu, fæðingu, brjóstagjöf og foreldrahlutverkið.
skrá mat á árangri og meðferð.