Námskeið um undirbúning fæðingar.

Hvert námskeið er í 2 skipti, 2 - 3 klst hvert sinn. Námskeiðið hentar vel eftir 28 vikna meðgöngu.

Námskeiðin eru á vegum Þróunarsviðs heilsugæslunnar. Þau eru haldin í Þönglabakka 1, 2. hæð. Inngangur frá bílastæði Þönglabakka milli Rauðakrossbúðarinnar og Nettó. Það er mikilvægt að mæta tímanlega þar sem innganginum er lokað þegar námskeiðið hefst. Boðið er uppá kaffi og te. Gjarnan má hafa með sér smávægilegt að borða.

Á námskeiðinu er fjallað um hvernig mætti undirbúa sig fyrir fæðinguna og foreldrahlutverkið. Hverju má búast við í aðdraganda fæðingar, í fæðingunni sjálfri og hvernig má bregðast við. Rætt er um eðlilega fæðingu; hvernig fæðing byrjar, hríðir, hvernig þær lýsa sér og hvað hefur áhrif á fæðingarferlið. Bent er á leiðir til að auðvelda fæðingu; ýmis ráð og sjálfshjálp. Einnig er fjallað um inngrip í eðlilega fæðingu, fæðingu með keisaraskurði, nýburann, fyrstu dagana eftir fæðingu, tengslamyndun og þær breytingar sem verða í fjölskyldu við fæðingu barns og aðlögun að breyttu hlutverki. Hvatt er til þess að foreldrar þekki viðbrögð við streituálagi og finni eigin styrkleika og noti eigin bjargráð. Einnig að verðandi foreldrar ræði þarfir og óskir opinskátt hvort við annað. Á námskeiðinu eru spurningar vel þegnar og boðið er upp á umræður.

Markmið námskeiðs er að efla sjálfstraust og sjálfshjálp verðandi foreldra í fæðingu, að verðandi foreldrar verði virkir þátttakendur í fæðingunni og styrkja jákvætt hugarfar gagnvart fæðingunni og foreldrahlutverkinu.

Skráning

Verð 10.500 kr. fyrir parið

Námskeiðsgjald greiðist við skráningu með greiðslukorti

Næstu námskeið 2018:
    
       
       

  • 8. og 9. maí        kl. 17:00
  • 16. og 17. maí    kl. 17:00

  • 5. og 7. júní        kl. 17:00
  • 11. og 13. júní    kl. 17:00