Starfið skiptist í þrjá þætti:
Teymi fagaðila, sem í eru tveir iðjuþjálfar og starfsmaður með BA-próf í sálfræði, starfar út frá hugmyndafræði valdeflingar og “case management”. Notendur sem sækja þjónustuna hafa umboðsmann innan teymisins sem tryggir góða yfirsýn.
Teymið leggur áherslu á samstarf við þá aðila sem koma að málefnum fólks með geðræn vandamál. Náið samstarf er við notendahópinn Hugarafl.
Eftirfylgd byggir á þjálfun, viðtölum, fræðslu og ráðgjöf.
Gert er mat í upphafi þar sem farið er yfir hvernig staðan er í dag og hverju skuli stefnt að. Sálfræðingur og iðjuþjálfar ákvarða í samvinnu við einstaklinginn hvaða leiðir skuli farnar og veita viðeigandi meðferð.
Mikilvægt er að vinna í því umhverfi sem vandamálin birtast í, til að þjónustan nýtist einstaklingnum sem best. Eftirfylgd fer til dæmis fram á heimili einstaklinganna, á vinnustað, í skóla eða annars staðar í nærumhverfi.
Tengslanet byggist á því að virkja fjölskyldu, vini og / eða aðra sem að einstaklingnum standa.
Aðstandendur eru studdir við að átta sig á hlutverki sínu og þannig tekið tillit til allra aðila í tengslanetinu, þ.e. fjölskyldunnar og notandans. Haldnir eru fundir, farið í vitjanir og unnið að skipulagi tengslanets. Einnig fer fram fræðsla og ráðgjöf.
Hópastarf.
Aðstandendahópur. Starfandi er aðstandendahópur í umsjá iðjuþjálfa. Markmiðið er að styðja og styrkja aðstandendur, hvetja þá til að huga að eigin heilsu og gefa þeim möguleika á að deila sameiginlegri reynslu sinni.
Hugarafl hittist á föstum fundum með iðjuþjálfa eða sálfræðingi tvisvar í viku á þriðjudögum og fimmtudögum kl. 13:00-15:00. Þeim sem óska eftir að taka þátt í hópnum er boðið upp á forviðtal þar sem farið er yfir markmið hópsins og vinnulag. Hópurinn hefur aðgang að iðjuþjálfa / sálfræðingi utan hefðbundins fundartíma til handleiðslu verkefna, einstaklingsviðtala eða annarrar eftirfylgdar.
Hugarafl er með vefsíðu. Slóðin er www.hugarafl.is.