Heilsugæsla höfuðborgarsvæðisins

Tilgangur og markmið ung- og smábarnaverndar er að fylgjast reglulega með heilsu og framvindu á þroska barna. Þannig er fylgst með vitsmuna- og tilfinningaþroska, ásamt félagslegum og líkamlegum þroska frá fæðingu til sex ára aldurs.

Áhersla er lögð á stuðning við fjölskylduna og þannig stuðlað að því, að börnum séu búin bestu möguleg uppvaxtarskilyrði á hverjum tíma, fræðslu og ráðgjöf og framkvæmd ónæmisaðgerða. Við frávik ber að tryggja að barn fái viðeigandi stuðning og þjónustu fagaðila.

Skömmu eftir fæðingu berst fæðingatilkynning á þá heilsugæslustöð sem sinnir svæðinu sem barnið býr á. Það tekur mislangan tíma fyrir tilkynninguna að berast heilsugæslustöðinni í pósti og er foreldrum því ráðlagt að hafa samband við sína heilsugæslustöð fljótlega eftir að heim er komið af fæðingadeildinni.

Öllum foreldrum nýfæddra barna er boðið upp á heimavitjanir fyrstu vikurnar og að koma síðan í kjölfarið á heilsugæslustöðina með barnið í skoðanir. Í heimavitjunum skoðar hjúkrunarfræðingur barnið, metur þroska þess, þyngd og höfuðummál. Foreldrar fá ráðgjöf og fræðslu varðandi ummönnun barnsins og eigin líðan.

Þegar barnið er sex vikna gamalt er læknisskoðun á heilsugæslustöð og við 3ja mánaða aldur hefjast bólusetningar. Hefðbundnar bólusetningar eru framkvæmdar samkvæmt fyrirmælum sóttvarnalæknis hjá Landlæknisembættinu. Foreldrum er ávallt velkomið að hafa samband við hjúkrunarfræðinga í ung- og smábarnavernd umfram þessar skipulögðu skoðanir.

Hér má sá yfirlit yfir skoðanir og bólusetningar í ung- og smábarnavernd eftir mismunandi aldri.

Nánari upplýsingar um ung- og smábarnaverndina færð þú á þinni heilsugæslustöð. Ef þú ert ekki viss um hvaða stöð þú tilheyrir getur þú slegið inn heimilisfangið þitt (í þgf) á forsíðu Heilsugæslu höfuðborgarsvæðisins og fengið upplýsingar um það eða skoðað kort.