- enn mikilvægara en áður
Hreinlæti í eldhúsinu kringum mat og matargerð og rétt meðhöndlun matvæla er alltaf mikilvægt en fær aukið vægi á meðgöngu þar sem skaðlegar bakteríur og sníkjudýr geta haft áhrif á heilsu bæði móður og barns.
Gott er að hafa eftirfarandi atriði í huga við meðhöndlun matvæla og matargerð:
- Mikilvægt er að þvo hendur vel fyrir matargerð og á eftir. Einnig eftir að hafa verið í snertingu við hrá matvæli, sand og mold.
- Rétt er að skola allt grænmeti (líka það sem er keypt niðurskorið) og ávexti fyrir notkun.
- Frosin matvæli ættu að þiðna í kæli en ekki í stofuhita til að hindra vöxt baktería. Gæta þarf þess að maturinn sé í ílátum sem tryggja að ekkert leki úr þeim yfir í önnur matvæli sem geymd eru í kælinum. Þiðnun í örbylgjuofni er í lagi ef varan er matreidd strax á eftir.
- Fáar bakteríutegundir drepast við frystingu.
- Alla matarafganga ætti að setja í kæli að máltíð lokinni.
- Halda ætti soðnum matvælum frá hráum til að hindra krossmengun.
- Þvo ætti skurðbretti og önnur áhöld þegar skipt er úr einni gerð hráefnis yfir í aðra (svo sami hnífur og bretti séu til dæmis ekki notuð fyrir kjúkling og hrátt grænmeti).
- Skipta ætti reglulega um borðtusku, viskastykki og uppþvottabursta.
- Forðast ætti að leyfa húsdýrum að ganga á bekkjum og borðum þar sem matargerð fer fram.
Yfirfarið: júní 2009.
Höfundar: Karitas Ívarsdóttir og Ragnheiður Bachmann, ljósmæður mæðravernd Þróunarstofu.