Er ástæða til að taka fjölvítamín?
Þær konur sem borða fjölbreyttan og næringarríkan mat þurfa yfirleitt ekki að taka önnur vítamín en fólat og D-vítamín og ef til vill einnig járn á seinni hluta meðgöngu.
Leiki hins vegar grunur á að mataræðið sé ekki nógu fjölbreytt og vel samsett er sjálfsagt að taka til dæmis eina venjulega fjölvítamíntöflu á dag eða vítamíntöflur sem sérstaklega eru ætlaðar konum á meðgöngu. Ráðleggingar um fjölvítamín eiga sérstaklega við ef kona hefur borðað lítið fyrstu vikurnar vegna ógleði og jafnvel léttst.
Ekki á að taka meira en ráðlagðan dagskammt og þær konur sem taka lýsi þurfa að muna að velja fjölvítamín án A-vítamíns. Margfaldir ráðlagðir dagsskammtar eiga ekki við á meðgöngu, því of mikið af næringarefnum geta verið fóstrinu skaðleg.
Er hægt að sleppa því að borða hollan mat ef maður tekur fjölvítamín?
Fjölvítamín kemur aldrei í staðinn fyrir heilsusamlegt mataræði.
Í fjölbreyttum og næringarríkum mat eru ýmis efni sem ekki hafa verið skilgreind til fulls en vitað er að eru heilsusamleg.
Það á við um hin ýmsu andoxunarefni sem er að finna í ávöxtum og grænmeti og einnig má nefna ýmsar trefjar í heilkornavörum. Auk þess virðist samvirkni efna úr matnum stundum tapast við það að tína út einstök efni og nota sem bætiefni. Rannsóknum fleygir fram á þessu sviði en lítið er vitað um það hvaða jafnvægi gæti verið raskað með inntökunni og afleiðingarnar eru að mestu óþekktar.
Borðar þú heilsusamlega?
Ef þú ert ekki viss um hvort mataræðið sé nógu hollt er gott að skrifa niður í nokkra daga allt sem þú borðar og bera svo saman við það sem sagt er hér að ofan.
Þú líka slegið inn upplýsingarnar á Matarvefnum og skoðað það betur.
Þarf að taka bætiefni á meðgöngu? pdf-skjal
Yfirfarið: júní 2009.
Höfundar: Karítas Ívarsdóttir og Ragnheiður Bachmann, ljósmæður Miðstöð mæðraverndar.
Textinn hér á síðunum undir: Bætiefni er byggður á efni sem var unnið af sérfræðihópi á vegum Miðstöðvar mæðraverndar; www.hg.is, Lýðheilsustöðvar; www.lydheilsustod.is og Umhverfisstofnunar; www.ust.is í samvinnu við Landlæknisembættið; www.landlaeknir.is , 2004.
Áhersla hefur verið lögð á fræðilegan grunn þeirra ráðlegginga sem gefnar eru en byggt er á vísindagreinum, yfirlitsgreinum og niðurstöðum úr íslenskum rannsóknum er varða mengun og smitsjúkdóma. Svipaðir bæklingar frá hinum norrænu ríkjunum og Bretlandi voru notaðir til hliðsjónar. Horft var til þess hvað ætti sérstaklega við hér á landi vegna íslenskra siða og venja í mataræði.