Fylgjuvefsýni - Legvatnssýni
Við legástungu er notuð sprauta með langri nál sem stungið er í gegnum kviðvegg móður. Fylgjuvefsýni eða legvatnssýni er dregið upp í sprautuna. Þegar fylgjuvefsýni er tekið er gerð staðdeyfing á stungustað. Ómskoðun er gerð til að sjá fóstrið, fylgjuna og legvatnið og sjá hvar best er að taka sýni. Hægt er að taka fylgjuvefsýni eftir 11 vikna meðgöngu. Ekki er mælt með því að gera það fyrr vegna hættu á fósturskaða.
Hægt er að taka legvatnssýni við 15-20 vikna meðgöngu.
Við legástungu getur örlítið magn af blóði fósturs borist í blóðrás móður. Það getur valdið mótefnamyndun hjá þeim konum sem eru í Rh- blóðflokki. Til þess að koma í veg fyrir það er þeim gefin immunóglóbulín sprauta eftir legástunguna.
Móðirin getur fundið fyrir vægum óþægindum við stunguna. Í einstaka tilvikum getur hún fundið fyrir vægum samdráttum, örlítilli blæðingu og/eða lítilsháttar legvatnsleka um leggöng eftir ástunguna.
Konan fær nánari upplýsingar um legástunguna, undirbúning og mögulega fylgikvilla, á Fósturgreiningadeild LSH.
Legástungu fylgir um 1% hætta á fósturláti.
Yfirfarið: júní 2009.
Höfundar: Karitas Ívarsdóttir og Ragnheiður Bachmann, ljósmæður mæðravernd Þróunarstofu.