Meðgönguverndin
Meðgönguvernd er í boði á öllum heilsugæslustöðvunum og er þjónustan ókeypis. Meðgönguvernd er í höndum ljósmæðra í samvinnu við heilsugæslulækna. Samvinna er á milli þeirra og fæðingarlækna á Miðstöð mæðraverndar.
Boðið er upp á fjölda skimana í meðgönguvernd. Tilgangurinn er að athuga hvort eitthvað kemur í ljós sem getur haft áhrif á heilsu móður og barns á meðgöngunni. Ómskoðun er boðin við 20 vikur, til að staðfesta meðgöngulengd, fjölda fóstra, staðsetningu fylgju og skoða líkamsgerð fósturs. Ómskoðunin er gerð í samvinnu við fósturgreiningadeild Landspítala og fer þar fram. Landspítali/fósturgreiningadeild býður upp á fósturrannsóknir; fósturskimanir og fósturgreiningu. Tilgangur þessarar skimunar er að meta líkur á litningafráviki hjá fóstri, meta meðgöngulengd og athuga fjölda fóstra. Einnig er líkamsgerð fósturs skoðuð eins vel og unnt er á þessum tíma með tilliti til sköpulagsgalla.
Þessi skoðun er ekki hluti af meðgönguverndinni en stendur öllum verðandi foreldrum til boða. Greiða þarf fyrir þessa skoðun. Hægt er að þiggja 11-14 vikna ómskoðun án þess að metnar séu líkur á litningafráviki.
Námskeið um undirbúning fæðingar eru í boði á heilsugæslustöðvunum. Á Miðstöð mæðraverndar eru slík námskeið í boði á ensku og pólsku ásamt sérhönnuðu námskeiði fyrir verðandi tvíburaforeldra. Fræðsla um brjóstagjöf, fræðsla sjúkraþjálfara og fræðsla fyrir verðandi feður er einnig í boði á Miðstöð mæðraverndar. Miðstöð mæðraverndar er staðsett á Þönglabakka 1. Sími: 585 1400.
Fæðingin
Á höfuðborgarsvæðinu eru tvær fæðingardeildir, Hreiðrið og Fæðingardeild 23-A, báðar á Kvennadeild Landspítalans.
Fæðingardeildin þjónar öllum fæðandi konum frá 22-24 vikna meðgöngu, hvort sem þær eru í eðlilegri fæðingu eða þarfnast sérstaks eftirlits.
Hreiðrið er bæði fæðingar- og sængurlegudeild. Þar geta allar heilbrigðar konur fætt eftir 37–42ja vikna eðlilega meðgöngu sem ganga með eitt barn. Ekki er gert ráð fyrir að kona noti mænurótardeyfingu í fæðingu í Hreiðrinu.
Boðið er upp á opið hús á báðum þessum deildum. Fæðingardeild er með opið hús alla þriðjudaga kl. 19:30, panta þarf tíma í síma: 543-3606 virka daga milli kl. 8:00 og 14:00. Hreiðrið er með opið hús annan hvern miðvikudag kl. 18:00, panta þarf tíma í síma 543-3250 á virkum dögum.
Konur sem íhuga að fæða heima geta fengið frekari upplýsingar hjá sinni ljósmóður í meðgönguverndinni eða hjá Ljósmæðrafélaginu í síma 564 6099. Á heimsíðu Ljósmæðrafélagsins er listi með nöfnum og símanúmerum þeirra ljósmæðra sem sinna fæðingum í heimahúsi. Ljósmæður í meðgönguvernd geta gefið upplýsingar um aðra kosti.
Sængurlegan
Að lokinni fæðingu býðst foreldrum að dvelja í Hreiðrinu í allt að sólarhring. Þangað geta systkini komið í heimsókn og aðrir ættingjar kjósi foreldrar það.
Eftir heimkomu gefst fjölskyldunni kostur á að fá heimaþjónustu sjálfstætt starfandi ljósmóður fyrstu vikuna heima.
Sængurkvennadeild Landspítalans er fyrir þær konur og börn sem þurfa sérhæfða þjónustu í sængurlegunni.
Ungbarnaverndin
Þegar heimaþjónustu ljósmæðra lýkur eða þegar heim er komið eftir lengri sængurlegu tekur þjónusta hjúkrunarfræðings/ljósmóður í ungbarnavernd við. Gott er að láta ungbarnaverndina á heilsugæslustöðinni vita þegar fjölskyldan er komin heim.
Bæklingar:
- Meðganga, fæðing og sængurlega (pdf-skjal)
- Antenatal and postnatal care in the capital area (pdf-skjal á ensku)