Heilsugæsla höfuðborgarsvæðisins

Barnið

• Hefur tekið á sig greinilega mannsmynd
• Líffærin stækka og þroskast
• Andlitsdrættir skýrast
• Allur líkaminn er þakinn fíngerðu dúnkenndu fósturhári
• Hár og augabrúnir vaxa
• Litfrumur í hárum myndast
• Opnar augun í 26. viku
• Hreyfingar verða kröftugri
• Lengd frá hvirfli til ilja við 24 vikur er um 30 sm
• Þyngdin við 24 vikur er um 700 g

Barnið heldur áfram að vaxa og hefur tekið á sig greinilega mannsmynd. Líffærin sem höfðu myndast öll á fyrsta tímabili eru nú að stækka og þroskast og andlitsdrættir eru að skýrast. Allur líkaminn er þakinn fíngerðu dúnkenndu fósturhári sem hverfur fyrir fæðingu. Það eru komin hár á koll barnsins og fíngerðar augabrúnir. Í 16 – 20 viku hefst myndun litfruma í hárunum. Augnlokin sem huldu augun opnast í 26. viku.

Barnið hreyfir sig svipað að degi og nóttu og það sefur aldrei nema nokkrar mínútur í einu. Hreyfingar barnsins verða kröftugri. Barnið réttir og kreppir fæturna og æfir fótaspörk. Í leginu er nóg rými fyrir barnið til þess að hreyfa sig og skipta um stöðu. Barnið nýtur þess að vera vaggað í legvatninu með hreyfingum móðurinnar.

• Brjóstin halda áfram að stækka
• Legið stækkar hratt og kúlan kemur í ljós
• Togverkir
• Brjóstsviði
• Ógleðin á undanhaldi
• Þreytan á undanhaldi
• Meiri orka
• Finnur fyrstu hreyfingar barnsins

Brjóstin halda áfram að stækka og legið stækkar í takt við barnið sem vex ört. Kúlan kemur í ljós. Þessar breytingar kalla á breytingu á klæðaburði. Togverkir í nára geta enn gert vart við sig. Brjóstsviði er kvilli sem margar konur finna fyrir á meðgöngu. Ástæðan er meðal annars sú að stækkandi leg þrýstir á maga móðurinnar, vöðvar við magaopið eru slakari og loft og magasýrur berast upp í vélindað.

Á þessu tímabili meðgöngunnar líður móðurinni jafnan vel; ógleðin er oftast horfin, þreytan er á undanhaldi og orkan er meiri. Sumum konum finnst þeim jafnvel aldrei líða eins vel og um miðbik meðgöngunnar.

Fyrstu hreyfingar barnsins birtast í fyrstu eins og loftbólur eða ólga í maganum en smám saman skynjar móðirin greinileg spörk og hreyfingar sem gefa henni staðfestingu á lífinu sem vex innra með henni.

Pabbinn fer ef til vill að finna fyrir vaxandi ábyrgðartilfinningu og fjölskylduhugsunin fer að gera vart við sig. Þungunin verður raunverulegri því í lok þessa tímabils getur pabbinn þreifað á hreyfingum barnsins.

Lesa meira:

fyrsta tímabil 0-12 vikur
þriðja tímabil 27. vika og fram að fæðingu

Yfirfarið: júní 2011.
Höfundar: Karitas Ívarsdóttir og Ragnheiður Bachmann, ljósmæður mæðravernd Þróunarstofu.