27. vika til loka meðgöngu
Barnið
-
Vex og þroskast
-
Safnar holdi
-
Neglur og hár vaxa
-
Heyrir og sýnir viðbrögð við hávaða
-
Næmt fyrir ljósi og blikkar auga
-
Gerir öndunaræfingar
-
Hikstar
-
Sefur lengri dúra í einu
-
Mjakar sér til en sparkar minna
-
Meðalþyngd við fæðingu er 3775 gr.
Barnið í móðurkviði heldur áfram að vaxa og þroskast. Á þessu tímabili hefst fitusöfnun og barnið safnar holdi. Neglur barnsins vaxa framyfir fingurgóma og höfuðhárið lengist.
Barnið heyrir nú þegar og þekkir hljóðin frá líkama móðurinnar, hjartslátt hennar og öndun. Það heyrir einnig hvað er um að vera utan móðurlífsins og sýnir viðbrögð. Stundum hreyfir það sig í takt við tónlist. Barnið þekkir vel taktinn og hljómfallið í rödd móður sinnar og lærir einnig að þekkja raddir þeirra sem eru nálægt móðurinni, t.d. rödd föður. Barnið er næmt fyrir ljósi og blikkar auga. Það er talið að á þessum tíma sé meðvitund barnsins vöknuð og hæfileikinn til að muna. Barnið gerir nú öndunaræfingar og getur fengið hiksta.
Það eru dægursveiflur í hreyfingum barnsins, það sefur nú lengri dúra í einu. Minna verður um spörk sökum plássleysis og móðirin finnur hreyfingar barnsins sem mjak og hnoð. Móðirin fylgist með daglegum hreyfingum barnsins sem gefur henni tækifæri til þess að vera í nánum tengslum við það og eru merki um góða líðan barnsins. Nú er hægt að gera sér grein fyrir hversu stórt og þungt barnið verður við fæðingu.
Móðirin
- Legið þenst út
- Óþægindi í grind og baki vegna álags
- Hreyfigeta minnkar
- Vökvasöfnun/bjúgur
- Verður andstutt og getur fundið fyrir mæði
- Brjóstsviði
- Breytt svefnmynstur
- Útferð frá leggöngum
- Væntanleg fæðing kemur æ oftar upp í hugann
- Undirbýr sig fyrir fæðingu og foreldrahlutverkið
Legið þenst út og heldur áfram að stækka í takt við barnið sem stækkar. Álag á grind og bak getur valdið óþægindum eða verkjum og haft áhrif á hreyfigetuna. Flestar konur finna fyrir vökvasöfnun/bjúg í einhverjum mæli. Vökvasöfnun er oftast mest áberandi á höndum og fótum.
Flestar konur verða andstuttar þegar líður á meðgönguna. Þetta stafar af því að legið þrýstir á þindina og konunni finnst hún ekki geta fyllt lungun af lofti. Brjóstsviði getur nú gert vart við sig hafi hann ekki þegar verið til staðar.
Svefnmynstur breytist oft á þessum tíma meðgöngunnar. Konan sefur léttar og vaknar oft upp á nóttunni. Ein kenningin er sú að móðir náttúra létti svefninn til þess að undirbúa væntanlega móður að vakna til barnsins. Þetta gerist fyrir tilstilli hormónabreytinga. Hin verðandi móðir er því strax farin að æfa móðurhlutverkið! Líkamlegar breytingar það er umfang legsins og barnsins hefur þau áhrif að erfitt getur verið að láta fara vel um sig og sofa í löngum dúrum, auk þess sem salernisferðir geta verið tíðar.
Síðustu vikur meðgöngunnar getur útferð frá leggöngum verið töluverð. Eðlileg útferð er hvítleit eða glær, hún er þunn, lyktarlaus og án kláða eða sviða. Móðirin finnur hreyfingar barnsins sem mjak og hnoð. Móðirin fylgist með daglegum hreyfingum barnsins sem gefur henni tækifæri til þess að vera í nánum tengslum við það og eru merki um góða líðan barnsins.
Væntanleg fæðing kemur æ oftar upp í hugann. Eftirvænting og tilhlökkun við það að sjá barnið, fá það í fangið og snerta það er ofarlega í huga. Einnig geta áhyggjur af því hvernig fæðingin muni ganga og hvort allt verði í lagi með barnið gert vart við sig.
Tilhugsunin um fjölskyldu er mikil. Væntanleg móðir og faðir eru farin að undirbúa fæðingu barnsins og foreldrahlutverkið. Samræður fara að snúast um barnið, hægt er að spjalla við það í móðurkviði og syngja fyrir það.
Lesa meira: